Afət Ziyadqızı
Fransa Prezidenti Emmanuel Makron qarşıdan gələn G7 sammiti ərəfəsində ABŞ Prezidenti Donald Trampı öz mövqeyinə yaxınlaşdırmaq üçün xüsusi diplomatik addımlar hazırlayır.
“Operativ Məlumat Mərkəzi-OMM” xəbər verir ki, bu barədə "Politico" nəşri məlumat yayıb.
Məlumata görə, Yelisey Sarayı Makron və Tramp üçün Versal Sarayında xüsusi şam yeməyi təşkil etməyi planlaşdırır. Lakin ABŞ Prezidentinin gözlənilməz davranışları nəzərə alınaraq, alternativ variant kimi qolf oyunu da nəzərdən keçirilir.
Bildirilir ki, Parisin əsas məqsədi Trampın dəbdəbəli və təmtəraqlı mühitlərə olan marağından istifadə edərək onu Avropa üçün mühüm əhəmiyyət daşıyan məsələlərdə fəal mövqe tutmağa təşviq etməkdir. Bunlara Rusiyanın Ukraynaya qarşı müharibəsi və İran ətrafında yaranmış gərginliyin iqtisadi nəticələri daxildir.
Nəşr qeyd edir ki, Avropa İttifaqı liderləri son on ilə yaxın müddətdə Trampla münasibətlərdə effektiv yanaşma formalaşdırmağa çalışırlar. Məqalədə vurğulanır ki, yaltaqlıq, nümayişkaranə dəbdəbə və müəyyən qədər "kral təmtərağı" G7 kimi beynəlxalq platformalara skeptik yanaşan Trampla münasibətlərin yaxşılaşdırılmasında təsirli vasitə hesab olunur.
