Luis de la Fuente: Lamin Yamal gələcəkdə daha çox tanınacaq

İspaniya millisinin baş məşqçisi Luis de la Fuente Millətlər Liqasının ikinci turunda Xorvatiyanı 4:1 hesabı ilə məğlub etdikləri oyundan sonra Lamin Yamalın çıxışından danışıb.

İspaniyalı mütəxəssis qarşılaşmanın ilk hissəsində hesabın daha böyük ola biləcəyini bildirib.

“İlk hissə 4:1 və ya 5:1 hesabı ilə başa çata bilərdi. İkinci hissə də eyni tempdə keçdi. Biz yaxşı müdafiə olunan və hava mübarizələrində güclü komandaya qarşı oynayırdıq. Hər epizodda diqqətli olmalı idik. Daha sonra toparlandıq, topu ələ keçirdik və oyuna nəzarəti bərpa etdik”, – de la Fuentenin sözlərini “Marca” yayıb.

Baş məşqçi iki qol vuran Lamin Yamalın inkişaf etmək və özünü dünyaya göstərmək istədiyini qeyd edib.

“Yamal inkişafını davam etdirmək və dünyaya necə futbolçu olduğunu göstərmək istəyir. O, çox təvazökardır və bu xüsusiyyət onu daha da yaxşı edir. Biz onun komandanın xeyrinə göstərdiyi bacarığından zövq aldıq. Gələcəkdə gördüyü işlərə və komanda oyununa görə daha çox tanınacaq”, – İspaniya millisinin çalışdırıcısı deyib.