Leyla Əliyeva və Alena Əliyeva Gəncə şəhərində yerləşən 4 nömrəli uşaq evini ziyarət ediblər.
"Operativ Məlumat Mərkəzi-OMM" xəbər verir ki, görüş zamanı qonaqlara uşaq evinin fəaliyyəti barədə ətraflı məlumat verilib. Bildirilib ki, 4 nömrəli uşaq evi valideynini itirmiş və valideyn himayəsindən məhrum olmuş 3-18 yaş arası uşaqlara xidmət göstərir.
Hazırda müəssisənin 64 sakini var. Onlara sosial-məişət, sosial-psixoloji, tibbi-sosial, sosial-pedaqoji və sosial-hüquqi xidmətlər göstərilir.
Qeyd olunub ki, bina 2012-ci ildə Heydər Əliyev Fondunun təşəbbüsü ilə əsaslı təmir olunub. Fond uşaq evinin sakinlərini daim diqqətdə saxlayır, burada mütəmadi olaraq şənliklər və əyləncəli tədbirlər təşkil edilir.
