Afət Ziyadqızı
Rusiyanın xarici işlər naziri Sergey Lavrov Ukraynada həyata keçirilən səfərbərlik prosesini kəskin tənqid edərək, məcburi çağırış tədbirlərinin tezliklə qadınlara da şamil oluna biləcəyini iddia edib.
“Operativ Məlumat Mərkəzi-OMM” xəbər verir ki, bu barədə xarici KİV-lər diplomatın Ukrayna münaqişəsinin nizamlanmasına dair səfirliklərin dəyirmi masasındakı çıxışına istinadən məlumat yayıb.
Məlumata görə, Lavrov Kiyev rejiminin insan hüquqlarına və yaşamaq hüququna hörmət etmədiyini bildirib. O, Ukrayna şəhərlərinin küçələrində kişilərin rəsmi çağırış vərəqəsi olmadan, güclə nəqliyyat vasitələrinə mindirilərək cəbhəyə aparıldığını iddia edən kadrları xatırladıb və yaxın vaxtlarda bu təcrübənin qadınlara da tətbiq olunacağını irəli sürüb.
Rusiya XİN rəhbəri həmçinin Avropa İttifaqının Rusiya məhsulları daşıyan gəmilərə tətbiq etdiyi məhdudiyyətlərə və saxlanılmalara toxunub. Lavrov vurğulayıb ki, Rusiya dünya bazarlarına neft, taxıl və gübrə tədarükü üzrə öz öhdəliklərini yerinə yetirməyə davam edəcək. Gəmilərin saxlanılmasının yalnız Rusiyaya dəyil, məhsulların çatdırılmalı olduğu üçüncü ölkələrin iqtisadiyyatlarına və qlobal ərzaq təhlükəsizliyinə birbaşa zərər vurduğunu diqqətə çatdırıb.
