ABŞ Prezidenti Donald Trampın Ukraynadakı dini vəziyyətlə bağlı məlumatlara kəskin reaksiya verdiyi bildirilib.
"Operativ Məlumat Mərkəzi-OMM" xəbər verir ki, bu barədə Rusiya Xarici İşlər naziri Sergey Lavrov Şərq İqtisadi Forumu çərçivəsində verdiyi açıqlamada məlumat verib.
Lavrovun sözlərinə görə, Rusiya Prezidenti Vladimir Putin və Donald Tramp arasında keçirilən görüşlərdən birində Ukraynadakı dini vəziyyət müzakirə olunub. Putin Ukrayna Pravoslav Kilsəsinin fəaliyyətinə qoyulan məhdudiyyətlər və təqiblər barədə məlumat verib.
Rusiya XİN rəhbəri iddia edib ki, Tramp bu məlumatı eşidəndə inanmayıb və sözün əsl mənasında sarsılıb.
Lavrov bildirib ki, Tramp məsələni dəqiqləşdirmək üçün ABŞ-nin dövlət katibi Marko Rubio ilə əlaqə saxlayıb. Rubio məlumatı təsdiqlədikdən sonra Trampın vəziyyəti təəccüblə qarşıladığı qeyd olunub.
Qeyd edək ki, daha əvvəl ABŞ Konqresinin Nümayəndələr Palatasının üzvü Anna Paulina Luna da Vaşinqtonu Ukraynada dini qurumlara qarşı tətbiq edilən təzyiqləri görməzdən gəlməməyə çağırıb.
