60 ildən artıqdır ki, ABŞ-nin iqtisadi embarqosu altında olan Kubada yanacaq böhranı kritik həddə çatıb.
"Operativ Məlumat Mərkəzi-OMM" xarici KİV-ə istinadən xəbər verir ki, Venesuela Prezidenti Nikolas Maduronun saxlanılması ilə nəticələnən əməliyyatdan sonra mühüm enerji dəstəyindən məhrum olan ada dövləti ciddi çətinliklərlə mübarizə aparır.
Havana rəhbərliyi yanacaq çatışmazlığına qarşı sərt qənaət tədbirlərini işə salıb.
Hökumətin qəbul etdiyi yeni qərarlara əsasən, ölkədə aşağıdakı məhdudiyyətlər tətbiq olunur:
- Yanacaq satışının karne (limit) sisteminə keçirilməsi;
- Bəzi turizm müəssisələrinin fəaliyyətinin dayandırılması;
- Təhsil müddətinin qısaldılması;
- Dövlət qurumlarında iş həftəsinin dörd günə endirilməsi.
Aviasiya sektoru da böhrandan ciddi zərər görüb. Rəsmi şəxslər aviasiya yanacağı olan benzinin tükənmək üzrə olduğunu və bu səbəbdən beynəlxalq aviaşirkətlərə yanacaq tədarükünün bir ay müddətinə dayandırıldığını bildiriblər. Bu vəziyyətin ölkədəki bütün beynəlxalq hava limanlarına təsir edəcəyi gözlənilir.
Xatırladaq ki, yanvarın 3-də Venesuelada baş verən hərbi əməliyyatdan sonra ABŞ administrasiyası Kuba üzərindəki təzyiqləri artırıb. Kuba Xarici İşlər Naziri Bruno Parrilla bu vəziyyəti "şantaj və zorakılıq" kimi xarakterizə edərək kəskin pisləyib.
