Konqoda Eboladan ölənlərin sayı 4315-ə çatdı

Konqo Demokratik Respublikasında (KDR) may ayından bəri Ebola virusuna 8 900-dən çox yoluxma halı qeydə alınıb.

“Operativ Məlumat Mərkəzi-OMM” xəbər verir ki, bununla bağlı xarici KİV məlumat yayıb.

Bildirilib ki, onlardan 4 300-dən çoxu xəstəlik səbəbindən həyatını itirib.

Həmçinin qeyd olunub ki, KDR-də 8 914 təsdiqlənmiş yoluxma və 4 315 ölüm halı qeydə alınıb. Ölüm göstəricisi 48,4 faiz təşkil edib.

Oktyabrın 5-də yayımlanan əvvəlki bülletendən sonra ölkədə daha 472 yoluxma və 235 ölüm halı qeydə alınıb.

Hazırda xəstəlik ölkənin şərqində yerləşən yeddi əyalətin 65 inzibati rayonunu əhatə edir. Bu, ötən həftə ilə müqayisədə bir rayon çoxdur.

Ebolanın hazırkı yayılması mayın 15-də Konqo Demokratik Respublikası və Uqandada başlayıb. Uqanda hakimiyyəti iyulun 28-də ölkədə epidemiyanın sona çatdığını elan edib. Ümumdünya Səhiyyə Təşkilatı (ÜST) isə bu məlumatı avqustun 25-də təsdiqləyib.

Oktyabrın 6-da Keniya hakimiyyəti ölkədə ilk Ebola virusuna yoluxma halının qeydə alındığını açıqlayıb. Virusa yoluxan şəxs Konqo Demokratik Respublikasında olan Keniya vətəndaşı olub. O, ölkəsinə qayıtdıqdan sonra oktyabrın 5-də xəstəxanada vəfat edib.

Keniyanın Səhiyyə Nazirliyinin məlumatına görə, 293 test aparılıb, lakin əlavə yoluxma halı aşkarlanmayıb.