Konqoda Ebola epidemiyası ilə bağlı vəziyyət gərginləşir: Ölənlərin sayı 220-yə çatıb

Konqo Demokratik Respublikasında Ebola virusunun yayılması ilə bağlı vəziyyət pisləşməkdə davam edir. Ümumdünya Səhiyyə Təşkilatının (ÜST) baş direktoru Tedros Adhanom Qebreyesus bildirib ki, ölkədə epidemiya nəticəsində şübhəli ölüm hallarının sayı 220-yə çatıb.

"Reuters" agentliyinin yaydığı məlumata görə, ÜST rəhbəri mövcud durumu kritik qiymətləndirib. Qebreyesus təşkilatın əməliyyatları genişləndirməsinə baxmayaraq, epidemiyanın sürətinin nəzarət imkanlarını üstələdiyini vurğulayıb.

Baş direktor vəziyyəti yerində qiymətləndirmək üçün mayın 26-da Konqo Demokratik Respublikasına səfər edəcəyini açıqlayıb. O, həmçinin qonşu dövlətləri epidemiyanın qarşısını almaq üçün təxirəsalınmaz qabaqlayıcı tədbirlər görməyə çağırıb.

Mütəxəssislər xəbərdarlıq edirlər ki, epidemiyanın nəzarətdən çıxması regionda ciddi humanitar və səhiyyə böhranına yol aça bilər.