OMM Redaksiyası
Bakıda keçirilən cüdo üzrə dünya çempionatının fərdi yarışlarının son günündə Azərbaycan təmsilçiləri +100 kq çəki dərəcəsində iki medal uğrunda mübarizə aparacaqlar. Uşangi Kokauri qızıl, Kənan Nəsibov və Camal Həmzətxanov isə bürünc medal görüşünə çıxacaqlar.
Kokaurinin finaldakı rəqibi rusiyalı İnal Tasoyevdir. Onlar indiyədək yeddi dəfə qarşılaşıblar və bütün görüşlərdə Tasoyev qalib gəlib. Bu, Azərbaycan cüdoçusu üçün uzun müddətdir davam edən uğursuz seriyanı dayandırmaq üçün səkkizinci fürsət olacaq.
Kokauri ilə Tasoyevin rəqabəti
Rəqiblər sonuncu dəfə bu il mayın 10-da Astanada keçirilən Böyük Dəbilqə turnirinin finalında qarşılaşıblar. Tasoyev yuko qazanaraq minimal üstünlüyünü qoruyub və turnirin qızıl medalını əldə edib. O, həmçinin 2023 və 2025-ci illərdə dünya çempionu olub və hazırkı dünya reytinqinin lideridir.
Onların ilk əlamətdar görüşlərindən biri 2018-ci ilin sentyabrında Bakıda keçirilən dünya çempionatının qarışıq komanda yarışında baş tutub. Tasoyev Kokauriyə qalib gəlib, Rusiya yığması isə Azərbaycan komandasını 4:1 hesabı ilə məğlub edərək bürünc medal qazanıb. Səkkiz il sonra rəqiblər yenidən Bakıda, bu dəfə fərdi dünya çempionu titulu uğrunda üz-üzə gələcəklər.
Azərbaycan cüdoçuları bürünc medal üçün yarışacaq
Nəsibovla Həmzətxanovun rəsmi turnirlərdəki əvvəlki üç qarşılaşmasının nəticəsində Nəsibov 2:1 öndədir. Onlar 2022-ci ildə Azərbaycan çempionatının finalında və 2025-ci ilin dekabrında ölkə çempionatının həlledici görüşündə qarşılaşıblar. Həmçinin 2025-ci ilin noyabrında Zaqrebdə keçirilən Qran-pridə Nəsibov qalib gəlib.
İdmançılar hər gün birlikdə məşq etdiklərindən bir-birlərinin güləş üslubuna yaxşı bələddirlər. Nəsibov və Həmzətxanov 2026-cı ilin martında Daşkənddə keçirilən Böyük Dəbilqə turnirində də medal qazanıblar: Nəsibov qızıl, Həmzətxanov isə bürünc mükafata sahib olub.
Bakıdakı həlledici görüşlər ərəfəsində Azərbaycan yığmasının aktivində beş medal var: Əhməd Yusifov qızıl, Zəlim Tçkayev gümüş, Rəşid Məmmədəliyev, Ömər Rəcəbli və Murad Fətiyev isə bürünc medal qazanıblar.
