Kanada hökuməti ABŞ-nin Kanada mallarına tətbiq etdiyi rüsumlara cavab olaraq Amerika məhsullarına qarşı yeni gömrük vergilərinin tətbiqinə qərar verib.
“Operativ Məlumat Mərkəzi – OMM” xəbər verir ki, ümumi dəyəri təxminən 28 milyard Kanada dolları (20 milyard ABŞ dolları) olan məhsullar yeni rüsumların əhatə dairəsinə düşəcək. Siyahıda polad məmulatları, mebel, təzə ton balığı, pambıq köynəklər və digər məhsullar yer alır.
Yeni tariflərin sentyabrın 8-dən qüvvəyə minməsi nəzərdə tutulur.
Kanadanın maliyyə naziri Fransua-Filip Şampan qərarı “strateji” və “mütənasib” cavab adlandırıb. Onun sözlərinə görə, ticarət danışıqlarının nəticəsiz qalması və Donald Tramp administrasiyasının Kanada mallarına 50 faizlik rüsum tətbiq etməsi Ottavanı qarşılıq verməyə məcbur edib.
Kanada hökuməti yerli istehsalçıları və işçiləri dəstəkləmək üçün əlavə 7,5 milyard Kanada dolları həcmində yardım proqramının ayrılacağını da açıqlayıb.
ABŞ Prezidenti Donald Tramp isə “Truth Social” hesabında Kanadanı sərt şəkildə tənqid edib. O, Ottavanı uzun illər ərzində ABŞ-ni “soymaqda” ittiham edib və Kanadanı “çətin və məntiqsiz” ticarət tərəfdaşı adlandırıb.
Tramp həmçinin gələn ilin yanvarından Kanada avtomobillərinə tətbiq edilən gömrük rüsumlarının 50 faizə qaldırıla biləcəyini bildirib.
Ağ Ev isə Vaşinqtonun danışıqlar zamanı Kanadaya geniş imtiyazlar təklif etdiyini, lakin Ottavanın “əsassız tələblər” irəli sürdüyünü iddia edib.
Ekspertlər qarşılıqlı rüsumların hər iki ölkənin iqtisadiyyatına mənfi təsir göstərə biləcəyini düşünürlər. Xüsusilə, uzun illər ərzində formalaşmış təchizat zəncirlərinin pozulmasının qiymət artımlarına və biznes xərclərinin yüksəlməsinə səbəb ola biləcəyi bildirilir.
Tərəflər arasında diplomatik kanallar vasitəsilə gərginliyi azaltmaq cəhdləri davam etsə də, ABŞ-Kanada ticarət qarşıdurmasının miqyası getdikcə genişlənir.
