OMM Redaksiyası
Əfqanıstanda fəaliyyət göstərən “İslam Dövləti” qruplaşmasının qolu ilə əlaqəli olan Məhəmməd Şərifullaya ABŞ-da 20 il həbs cəzası verilib. O, 2021-ci il avqustun 26-da Kabil hava limanının “Abbey Gate” girişində törədilən intiharçı hücumu ilə bağlı məhkəmə qarşısına çıxarılıb.
ABŞ-ın Virciniya ştatında federal münsiflər heyəti apreldə Şərifullanı “İslam Dövləti-Xorasan Vilayəti”nə (ISKP) maddi dəstək göstərmək məqsədilə sui-qəsd hazırlamaqda təqsirli bilib. Bununla belə, münsiflər onun dəstəyinin partlayış nəticəsindəki ölümlərə birbaşa səbəb olub-olmadığı barədə razılığa gələ bilməyiblər.
ABŞ Ədliyyə Nazirliyinin məlumatına görə, Şərifulla təxminən on il ərzində ISKP-nin fəaliyyətini dəstəkləyib və 2016-cı ildən 2025-ci ildə saxlanılanadək 12-dən çox hücumda iştirak edib.
İstintaqa əsasən, Şərifulla hücumdan əvvəl hava limanına gedən marşrutu yoxlayıb, “Taliban”ın nəzarət-buraxılış məntəqələri barədə məlumat toplayıb və yolun açıq olduğunu ISKP rəhbərliyinə bildirib. Bundan bir neçə saat sonra hava limanının “Abbey Gate” girişində intiharçı partlayıcı qurğunu işə salıb.
2021-ci il hücumu nəticəsində təxminən 160 əfqan və 13 ABŞ hərbçisi həlak olub. Hadisə “Taliban”ın avqustun 15-də Kabilə nəzarəti ələ keçirməsindən və ABŞ ilə beynəlxalq qüvvələrin ölkədən çıxarılması prosesindən sonra baş verib.
ABŞ rəsmiləri Şərifullanı 2016-cı ildə Kabildə nepallı təhlükəsizlik əməkdaşlarını hədəf alan partlayışda və 2024-cü ildə Moskva yaxınlığındakı “Crocus City Hall” hücumunda da iştirak etməkdə əlaqələndiriblər. Sonuncu hücumda 100-dən çox insan öldürülüb.
