İsrail Qəzza zolağının Misirlə sərhədindəki Rafah şəhərinə qoşun yeridilməsini qaçılmaz hesab edir.

"Operativ Məlumat Mərkəzi-OMM" xəbər verir ki bunu İsrailin müdafiə naziri Yoav Galant amerikalı həmkarı Lloyd Austinə telefon danışığında deyib.

İsrail Müdafiə Nazirliyinin mətbuat xidmətindən verilən məlumata görə, Galantın Ostinlə söhbəti gecə saatlarında baş tutub, İsrail naziri həmsöhbətinə Fələstin ilə sərhəddə "Kerem-Şalom" nəzarət məntəqəsinin yaxınlığının atəşə tutulması barədə məlumat verib.

"Söhbət əsnasında nazir Galant girovları azad etmək üçün görülən səyləri müzakirə etdi və bu mərhələdə HƏMAS-ın təklif olunan razılaşma çərçivəsindən imtina etdiyini bildirdi. Nazir Galant Rəfah bölgəsində hərbi əməliyyatlara ehtiyac olduğunu vurğuladı".

İsrail ordusunun 2023-cü il oktyabrın 7-dən etibarən Qəzza zolağına həyata keçirdiyi hücumlarda ölənlərin sayı son 24 saatda 83 nəfər artaraq 35 min 386-ya çatıb.

"Operativ Məlumat Mərkəzi-OMM" xəbər verir ki, bu barədə xarici KİV məlumat yayıb.

Qeyd olunub ki, İsrailin oktyabrın 7-dən etibarən Qəzza zolağına təşkil etdiyi hücumlarda yaralananların sayı isə 79 min 366-ya yüksəlib. Bəyanatda həmçinin dağıntılar altında və yol kənarında hələ də ölənlərin olduğu, lakin İsrail qüvvələrinin maneəsi üzündən tibb qruplarının və mülki müdafiə işçilərinin cəsədlərə çata bilmədiyi bir daha vurğulanıb.

Qəzzadakı Fələstinin Mülki Müdafiə İdarəsi İsrail ordusunun bir həftə əvvəl hərbi hücumlara başladığından bəri Qəzza zolağının şimalındakı Cibaliya bölgəsində 300 evi dağıddığını açıqlayıb.

"Operativ Məlumat Mərkəzi-OMM" xəbər verir ki, bu barədə xarici KİV məlumat yayıb.

Qəzza Mülki Müdafiə İdarəsinin sözçüsü Mahmud Basal deyib: “Hərbi hücum başlayandan (bir həftə əvvəl) İsrail ordusu Qəzzanın şimalında, Cibaliyada 300-dən çox evi tamamilə dağıdıb"

Basal yollarda və dağılmış evlərin dağıntıları altında çoxlu cəsədin olduğunu bildirərək kömək çağırışları aldıqlarını qeyd edib.

Hindistanın şimalında yüksək temperaturla əlaqədar paytaxt Yeni Dehli və ətraf ştatlarda xəbərdarlıq edilib.

"Operativ Məlumat Mərkəzi-OMM" xəbər verir ki, bu barədə xarici KİV məlumat yayıb.

Hindistan Meterologiya Departamentin (IMD) açıqlamasına görə, dünən paytaxt Yeni Dehlidə havanın temperaturu 47,1 dərəcəyə çatıb. Ətrafdakı Pəncab, Haryana və Racastan ştatlarında istilərlə bağlı xəbərdarlıq edilib.

Mütəxəssislər aprelin 19-dan iyunun 1-dək keçirilən ümumi seçkilərdə mitinqlərə qatılan və ya növbə gözləyən seçicilərdən isti vurmağa qarşı tədbir görmələrini istəyib.

Almaniya “Patriot” hava hücumundan müdafiə sistemlərinin də cəlb olunduğu hərbi təlimlərə başlayıb.

"Operativ Məlumat Mərkəzi-OMM"-in “Deutsche Welle”yə istinadən xəbərinə görə, bunu ölkənin müdafiə naziri Boris Pistorius Litvalı həmkarı ilə görüşdən sonra bildirib.

O söyləyib ki, ölkəsi yaxın vaxtlarda Ukraynaya əlavə bir ədəd hava hücumundan müdafiə kompleksi, hava-hava tipli “IRIS-T” raket sistemləri, “Gepard” zenit-raket kompleksi, eləcə də artilleriya qurğuları və digər növdə sursatlar göndərəcək.

Nazirin sözlərinə görə, bu məqsədlə ukraynalı hərbçilər də sözü gedən manevrlərə cəlb olunub.

Qara dənizdə Tanzaniya bayrağı altında üzən “Mohammed-Z” gəmisi batıb.

"Operativ Məlumat Mərkəzi-OMM" xəbər verir ki, bu barədə Rumıniya Dəniz Administrasiyası məlumat yayıb.

Məlumata görə, gəmi Rumıniyanın Sfıntu-Qeorqe şəhərindən 26 dəniz mili aralıda batıb.

Qeyd edilib ki, “Mohammed -Z”in ekipajı 11 nəfərdən - 9 Suriya və 2 Misir vətəndaşından ibarət olub. Onlardan 8-i xilas edilib. Digər 3 ekipaj üzvünün axtarışları davam edir.

Qəzanın səbəblərini müəyyən etmək üçün araşdırmalara başlanılıb.