İsrailin müdafiə naziri çərşənbə günü verdiyi açıqlamada İsrail qoşunlarının Livanın cənubundan geri çəkilməyəcəyini bəyan edib.
"Operativ Məlumat Mərkəzi-OMM" xəbər verir ki, bu qərar ABŞ və İran arasında davam edən sülh danışıqları fonunda regionda yeni gərginlik elementi kimi qiymətləndirilir.
Məlumata görə, ABŞ dövlət katibi Marko Rubio Yaxın Şərqə səfəri çərçivəsində müttəfiqləri danışıqlar prosesinin etibarlılığına inandırmağa çalışır və Vaşinqtonun Körfəz ölkələrinin təhlükəsizliyinə zərər verəcək heç bir addım atmayacağını vurğulayıb.
Bildirilib ki, ABŞ Prezidenti Donald Tramp İranın danışıqlarda ciddi güzəştlərə getdiyini qeyd edərək, prosesin gedişatından məmnunluğunu ifadə edib. Bununla belə, regiondakı bəzi müttəfiqlərin narahatlığı davam edir.
Qeyd olunub ki, Hörmüz boğazında nəqliyyat axınının artması və diplomatik irəliləyişlər fonunda enerji bazarlarında ucuzlaşma müşahidə olunub. Beynəlxalq etalon sayılan Brent markalı neftin qiyməti 4,6% azalaraq bir barel üçün 74 dollardan aşağı düşüb.
Məlumata əsasən, BMT-nin gəmiçilik agentliyi tərəfindən həyata keçirilən təxliyə mexanizmi çərçivəsində bir sıra ticarət gəmiləri Hürmüz boğazından təhlükəsiz keçid edib. Eyni zamanda, Oman və Qətər rəsmiləri regional proseslər və sülh danışıqlarının gedişini müzakirə ediblər.
Bildirilib ki, Avropa İttifaqının Aviasiya Təhlükəsizliyi Agentliyi (EASA) İran, İraq və Livanın hava məkanından istifadə etməmək barədə tövsiyələrini qüvvədə saxlayır.
Qeyd olunub ki, İran parlamentinin sədri Məhəmməd Baqir Qalibaf Bakıda keçirilən İslam Əməkdaşlıq Təşkilatı Parlament İttifaqının iclasında çıxış edərək əldə olunan razılaşmanı ABŞ-nin siyasi məğlubiyyəti kimi dəyərləndirib. Eyni zamanda, MAQATE rəhbəri Rafael Qrossi İranın nüvə obyektlərində yoxlamaların aparılacağını təsdiqləyib.
Məlumata görə, ABŞ-nin Küveytdəki səfirliyi mart ayında baş vermiş hücumlardan sonra dayandırılmış fəaliyyətini bərpa edib. ABŞ Senatında isə Prezident Donald Trampın İrana qarşı hərbi səlahiyyətlərinin məhdudlaşdırılması ilə bağlı səsvermə keçirilib, lakin bu addımın hazırkı diplomatik prosesə dərhal təsir etməyəcəyi bildirilir.
