OMM Redaksiyası
İsrail hakimiyyəti "FlyDubai" aviaşirkətinə məxsus sərnişin təyyarəsində baş verən fövqəladə hadisəni terror aktı kimi qiymətləndirir.
“Operativ Məlumat Mərkəzi-OMM” xəbər verir ki, bununla bağlı xarici KİV məlumat yayıb.
Bildirilib ki, bu qənaət hadisənin araşdırılması və sərnişinlərin ifadələrinin toplanmasından sonra formalaşıb.
İlkin məlumata görə, ikinci pilot kapitana bir neçə dəfə bıçaqla zərbə endirib və təyyarənin idarəetməsini ələ keçirməyə çalışıb.
Adı açıqlanmayan yüksəkvəzifəli İsrail rəsmisi bildirib ki, çox ciddi fəlakətin qarşısını almaq mümkün olub.
Onun sözlərinə görə, hazırda ikinci pilot dindirilir.
İsrail mediası təyyarənin daxilində çəkildiyi ehtimal olunan fotolar da yayıb. Fotolardan birində sərnişinə məxsus qanlı köynəyin göründüyü bildirilir.
İstintaqın əsas versiyalarından birinə görə, ikinci pilotun hərəkətləri qəsdən olub və o, təyyarənin idarəetməsini ələ keçirərək onu məhv etməyə çalışıb.
"Walla" agentliyinin məlumatında isə qeyd olunub ki, istintaqa cəlb olunan pilot Oman vətəndaşıdır. Bununla yanaşı, bəzi media orqanları təyyarə kapitanının Rusiya, ikinci pilotun isə Ukrayna vətəndaşı olduğunu yazıb.
İsrail Baş nazirinin administrasiyasının nümayəndəsi bütün sərnişinlərin təhlükəsiz olduğunu açıqlayıb.
Bildirilib ki, vəziyyət “nəzarət altındadır” və İsrail vətəndaşlarının ölkəyə qaytarılması üçün bütün lazımi tədbirlər görülür.
Məlumat üçün bildirək ki, hadisə daha əvvəl Dubaydan Təl-Əvivə uçan "FlyDubai"nin FZ1073 saylı reysində baş verib. Təyyarə İordaniyanın hava məkanından keçərkən əvvəlcə ümumi fövqəladə siqnal, daha sonra isə mümkün qaçırılma və ya qanunsuz müdaxiləyə işarə edən siqnal göndərib. Təyyarə Səudiyyə Ərəbistanına yönələrək ölkənin şimal-qərbində yerləşən Tabuk hava limanına enib. Təyyarədə təxminən 180 sərnişinin olduğu bildirilir.
