İslandiyada vətəndaşlar ölkənin Avropa İttifaqı ilə üzvlük danışıqlarına başlayıb-başlamaması ilə bağlı referendumda səs verəcəklər.
“Operativ Məlumat Mərkəzi – OMM” xəbər verir ki, avqustun 29-da keçiriləcək səsvermə birbaşa Aİ-yə üzvlüklə bağlı olmayacaq. Seçicilər yalnız Brüssellə danışıqlara başlanmasına qərar verəcəklər.
Müsbət nəticə olacağı təqdirdə, danışıqların ən azı iki il davam edəcəyi və yekun üzvlük məsələsinin daha sonra ikinci referendumda müəyyənləşəcəyi bildirilir.
Aİ-yə üzvlüyün tərəfdarları iqtisadiyyatın güclənəcəyini, ticarət imkanlarının genişlənəcəyini və vahid bazara çıxışın ölkəyə fayda verəcəyini düşünürlər.
Müxaliflər isə xüsusilə balıqçılıq sektorunda milli suverenliyin məhdudlaşacağından və Aİ qaydalarının ölkənin qərarvermə imkanlarına təsir göstərəcəyindən narahatdırlar.
