İran nümayəndə heyətinin rəhbəri Məhəmməd Bağır Qalibaf Omanın paytaxtı Maskata rəsmi səfər edib.
"Operativ Məlumat Mərkəzi-OMM" xəbər verir ki, səfər çərçivəsində Qalibaf Oman Sultanı Heytəm bin Tariqlə görüş keçirib.
Məlumata görə, görüş zamanı iki ölkə arasında strateji tərəfdaşlığın möhkəmləndirilməsi, regional əməkdaşlığın genişləndirilməsi və qarşılıqlı maraq doğuran məsələlər müzakirə olunub.
Bildirilib ki, danışıqların əsas mövzularından biri dünya enerji təchizatı baxımından mühüm əhəmiyyət daşıyan Hörmüz boğazı ilə bağlı məsələlər olub. Tərəflər bölgədə təhlükəsizliyin təmin edilməsi və fəaliyyətlərin koordinasiyası məqsədilə birgə komitənin yaradılması imkanlarını nəzərdən keçiriblər.
Qeyd olunub ki, görüşdə regional sabitliyin qorunması və iqtisadi əlaqələrin daha da inkişaf etdirilməsi istiqamətində fikir mübadiləsi aparılıb.
Məlumata görə, Məhəmməd Bağır Qalibafın rəhbərlik etdiyi “Minab 168” nümayəndə heyəti Oman rəsmiləri ilə birgə layihələrin həyata keçirilməsi perspektivlərini də müzakirə edib.
