Afət Ziyadqızı
İranın İslahatçı Cəbhəsi ölkədə internet məhdudiyyətlərinin və qeyri-bərabər çıxış imkanlarının vətəndaşların gündəlik həyatına mənfi təsir göstərdiyini bildirərək qlobal internetə bərabər çıxışa çağırış edib.
"Operativ Məlumat Mərkəzi-OMM" xəbər verir ki, bu barədə çərşənbə günü yayılan bəyanatda qeyd olunub.
Məlumata görə, bəyanatda kibertəhlükəsizlik siyasətinin “geniş qapanmalardan” daha çox texniki, hədəflənmiş və peşəkar yanaşmalara keçməli olduğu vurğulanıb. Qrup eyni zamanda insanların sabit, pulsuz və təhlükəsiz internetə çıxışının dərhal bərpa edilməsinin vacibliyini bildirib.
Qeyd olunub ki, İslahatçı Cəbhə milyonlarla iranlının gəlir, təhsil, səhiyyə və ailə əlaqələri üçün internetdən asılı olduğunu xatırladaraq, bu sahədə yaranan fasilələrin sosial və iqtisadi problemləri dərinləşdirdiyini vurğulayıb.
Bildirilib ki, bəyanatda qeyri-bərabər internet çıxışı, o cümlədən “səviyyəli internet xidmətləri” tənqid edilib və hakimiyyət orqanlarına qlobal şəbəkəyə çıxışı bütün vətəndaşlar üçün fundamental hüquq kimi tanımaq çağırışı edilib.
