İran Hörmüz boğazında təhlükəsizliyin təmin edilməsi məqsədilə yeni qanun layihəsi hazırlayıb.
“Operativ Məlumat Mərkəzi – OMM” xəbər verir ki, İran parlamentinin yüksək vəzifəli nümayəndəsinin sözlərinə görə, sənəd qəbul ediləcəyi təqdirdə regionda gərginlik yaradan və ya kəşfiyyat fəaliyyəti ilə məşğul olan gəmilərin boğazdan keçidinə məhdudiyyət qoyulacaq.
Qanun layihəsinin əsas məqsədi strateji əhəmiyyət daşıyan su yolunda təhlükəsizliyi gücləndirmək və xarici müdaxilələrin qarşısını almaqdır.
Sənəddə düşmən mövqeli gəmilərin keçidinin məhdudlaşdırılması, kəşfiyyat və casusluq fəaliyyəti ilə məşğul olduğu müəyyən edilən gəmilərə qarşı nəzarətin sərtləşdirilməsi nəzərdə tutulur.
Hörmüz boğazı dünya enerji təchizatının əsas marşrutlarından biri hesab olunur. Bu səbəbdən boğazda gəmiçilik fəaliyyətinə tətbiq edilə biləcək hər hansı məhdudiyyət qlobal neft və qaz bazarlarına ciddi təsir göstərə bilər.
İranın yeni təşəbbüsü bölgədə artan hərbi və siyasi gərginlik fonunda boğaz üzərində nəzarətin daha da sərtləşdirilə biləcəyi ehtimalını artırır.
