Afət Ziyadqızı
Rusiya və Ukrayna arasında növbəti hərbi əsir mübadiləsi həyata keçirilib.
“Operativ Məlumat Mərkəzi – OMM” xəbər verir ki, Rusiya Müdafiə Nazirliyinin məlumatına görə, avqustun 19-da Kiyevin nəzarətində olan ərazilərdən 103 rusiyalı hərbçi geri qaytarılıb.
Eyni sayda, yəni 103 ukraynalı hərbçinin də qarşı tərəfə təhvil verildiyi bildirilib.
Rusiya Müdafiə Nazirliyinin açıqlamasına əsasən, əsirlikdən azad edilən rusiyalı hərbçilər hazırda Belarus ərazisindədir.
Onlarla Rusiya Federasiyasının insan hüquqları üzrə müvəkkili Yana Lantratovanın çalışdığı bildirilib.
Rəsmi məlumata görə, hərbçilərə ilkin tibbi və psixoloji yardım göstəriləcək. Bundan sonra onların reabilitasiya üçün Rusiya Müdafiə Nazirliyinin tabeliyində olan hospitallara göndərilməsi nəzərdə tutulur.
Qeyd edək ki, növbəti əsir mübadiləsinin həyata keçirilməsində Birləşmiş Ərəb Əmirlikləri (BƏƏ) vasitəçi qismində çıxış edib.
