OMM Redaksiyası
İranın məhkəmə orqanları Tehranda Fransa səfirliyi ilə əlaqəli Fransız Dili Mərkəzini (CLF) “qanunsuz fəaliyyət” göstərməkdə ittiham edərək bağlayıb.
Tehran Prokurorluğunun qərarı ilə bazar günü möhürlənən mərkəzə fəaliyyət üçün lisenziya alması barədə yerli qurumlar tərəfindən dəfələrlə xəbərdarlıq edildiyi, lakin bu tələbin yerinə yetirilmədiyi bildirilib.
İranın ittihamları
İran məhkəmə sisteminə bağlı “Mizan” agentliyinin yaydığı açıqlamaya görə, mərkəzin fəaliyyəti dil tədrisi ilə məhdudlaşmayıb. Rəsmilər təhsil proqramlarının İran-İslam mədəniyyətinə və milli təhlükəsizliyə zidd layihələr üçün örtük kimi istifadə edildiyini iddia ediblər.
Açıqlamada mərkəzin istedadlı iranlıların müəyyənləşdirilməsi və əlaqələndirilməsi, eləcə də onların ölkədən çıxmasına şərait yaradılması ilə məşğul olduğu da qeyd olunub.
Tehran-Paris münasibətlərində gərginlik
Mərkəzin bağlanması Tehran və Paris arasında məhbuslarla bağlı fikir ayrılıqları, diplomatların və mədəniyyət attaşelərinin qarşılıqlı şəkildə ölkədən çıxarılmasından sonra yaranan sonuncu diplomatik mübahisədir.
Hadisə İranla bir sıra Avropa ölkələri arasında münasibətlərin gərginləşdiyi bir vaxta təsadüf edir. Bu çərçivədə İsveç və Almaniya ilə bağlı məsələlər üzrə səfirlər çağırılıb, bəzi diplomatlar isə “persona non grata” elan edilib.
Fransa, Almaniya, Böyük Britaniya və ABŞ yaxın vaxtlarda Beynəlxalq Atom Enerjisi Agentliyinin Direktorlar Şurasında İranın nüvə proqramı ilə bağlı qətnamə irəli sürüblər. Sənəddə məsələnin BMT Təhlükəsizlik Şurasına və Baş Assambleyasına çıxarılması tələb olunub.
Arakiçidən fransalı həmkarına cavab
Tehran və Paris arasındakı son mübahisədən əvvəl İranın xarici işlər naziri Abbas Arakiçi Fransa xarici işlər naziri Jan-Noel Barrotun insan haqları ilə bağlı ittihamlarına cavab verib.
Arakiçi “X” platformasındakı paylaşımında Barrotu ABŞ-İsrail hava zərbələri nəticəsində iranlı məktəblilərin öldürülməsindən sonra Fransanın susmasına görə tənqid edib və “İkiüzlü göz yaşlarına son qoyun” ifadəsini işlədib.
Arakiçi BMT Baş Assambleyasının iclasında iştirak etmək üçün Nyu-Yorka gedib. Onun tədbir çərçivəsində Barrot da daxil olmaqla həmkarları ilə ikitərəfli məsələləri və regional prosesləri müzakirə edəcəyi gözlənilir.
