İranın xarici işlər naziri Abbas Araqçi Nyu-Dehli şəhərində keçirilən BRICS toplantısında BMT Təhlükəsizlik Şurasında islahatların vacibliyini vurğulayıb.
“Operativ Məlumat Mərkəzi-OMM”xəbər verir ki, bu barədə "Tasnim News Agency" məlumat yayıb.
Araqçi bildirib ki, bu məsələ artıq seçim deyil, Birləşmiş Millətlər Təşkilatının fəaliyyəti və gələcəyi üçün zərurətə çevrilib.
Onun sözlərinə görə, Tehran dünyanın bütün qitə və bölgələrini real şəkildə təmsil edən Təhlükəsizlik Şurasının yaradılmasını istəyir.
“BRICS qlobal idarəetmənin yenidən qurulması və çoxtərəfliliyə inamın bərpası üçün öz imkanlarından istifadə etməlidir”, – deyə iranlı nazir bildirib.
Əraqçi qeyd edib ki, hazırda bəzi beynəlxalq qurumlarda müşahidə olunan vəziyyət çoxtərəflilik deyil, beynəlxalq hüquq adı altında birtərəfli siyasətin qorunması cəhdidir.
O əlavə edib ki, qanunlardan vasitə kimi istifadə olunması, birtərəfli sanksiyalar və dövlətlərin suverenliyinə hörmətsizlik qlobal idarəetmədə ciddi böhranın göstəricisidir.
