OMM Redaksiyası
İndoneziyada 60 valideyn uşaqlarının hökumətin pulsuz yemək proqramı çərçivəsində təqdim olunan qidalardan sonra xəstələnməsi ilə bağlı polisə şikayət edib. Şikayət Prezident Prabovo Subiantonun əsas təşəbbüsünə qarşı ilk hüquqi araşdırma tələbi olub.
Müraciət proqramı həyata keçirən Milli Qidalanma Agentliyinə, yeməkləri hazırlayan mətbəxə və onları şagirdlərə paylayan məktəblərə qarşı verilib. Şikayətdə konkret şəxs şübhəli qismində göstərilməyib və hələlik cinayət ittihamı irəli sürülməyib.
Valideynlərin vəkili Aslia Sijabat mümkün səhlənkarlıqla bağlı araşdırma aparılmasını, şübhəlilərin müəyyənləşdirilməsini, cinayət işi başlanmasını və zərər çəkmiş ailələrə kompensasiya ödənilməsini tələb etdiklərini bildirib.
Şikayət avqustun 31-də təqdim edilib, lakin bu barədə məlumat yalnız cümə axşamı mediaya açıqlanıb. Karo rayonunda yaşayan Fitri Sijabatın sözlərinə görə, avqustun ortalarında Şimali Sumatranın Karo bölgəsindəki bir neçə liseydə ən azı 300 şagird pulsuz yeməklərdən sonra xəstələnib. Onlardan bəziləri xəstəxanaya yerləşdirilib.
Fitri Sijabatın 17 yaşlı qızı Aqnes də zərərçəkənlər arasında olub. O, xəstəxanaya aparılıb və ertəsi gün evə buraxılıb. Lakin bir neçə gün sonra ürəkbulanma, qaşınma və keylik şikayətləri ilə yenidən xəstəxanaya yerləşdirilib. Aqnes bir ay ərzində dörd dəfə xəstəxanada müalicə alıb.
“Ümid edirəm ki, onlar proqramı dayandıracaqlar. Uşaqlarımız belə vəziyyətə düşürsə, dövlət büdcəsini niyə boş yerə xərcləmək lazımdır?” – Fitri Sijabat deyib.
Vəkil Aslia Sijabat ölkənin digər bölgələrində də oxşar hadisələrin baş verdiyini bildirib. Onun sözlərinə görə, həmin işlərdə şübhəlilərin müəyyənləşdirilməməsi məsuliyyətsizlik mühiti yaradıb. Valideynlər hökumətə qarşı ayrıca iddia qaldırmağa da hazırlaşırlar.
Karo polisi qida nümunələri üzrə məhkəmə-tibbi ekspertizanın nəticələrini gözləyir. Testlər Şimali Sumatranın polis məhkəmə-tibbi laboratoriyasında aparılır. Polis sözçüsü Pedoman Maha bildirib ki, müstəntiqlər şagirdləri, müəllimləri və qidalanma üzrə mütəxəssisi də dindirirlər.
Hadisə İndoneziyada proqramla bağlı yaranan problemlərin fonunda baş verib. Son həftələrdə ölkənin müxtəlif bölgələrində kütləvi qida zəhərlənməsi halları qeydə alınıb. Ötən həftə bir neçə vilayətdə proqram çərçivəsində verilən yeməklərdən sonra 2 mindən çox insan xəstələnib.
Prabovonun seçki vədlərindən biri olan pulsuz yemək proqramının cari dövr üçün büdcəsi 229 trilyon rupiyə, yəni təxminən 13 milyard dollara çatır. Proqram İndoneziya üzrə 83 milyon məktəbli və hamilə qadını qida ilə təmin etməyi hədəfləyir.
Proqramın büdcəsi artıq bir dəfə azaldılıb, iki rəhbər dəyişdirilib. Rəhbərlərdən biri korrupsiya ittihamı ilə polis nəzarətindədir. Təşəbbüs fəaliyyətə başladığı vaxtdan idarəetmədə pozuntular və korrupsiya iddiaları ilə üzləşib. Proqramla əlaqəli 50 mindən çox qida zəhərlənməsi halının qeydə alındığı bildirilir.
