OMM Redaksiyası
Hörmüz boğazının cənubunda cümə axşamı qeydə alınan bir neçə güclü partlayış neft tankerlərinin dəniz minalarına toxunması ilə bağlı ola bilər. İranın dövlət teleradio şirkəti IRIB-in adı açıqlanmayan hərbi mənbələrə istinadən yaydığı məlumatda belə deyilir.
Hadisədən zərər çəkən gəmilərin və itkilərin sayı hələ müəyyənləşməyib. İran hərbi mənbələrinin iddiasına görə, tankerlər dəniz dəhlizində “icazəsiz” marşrutlardan istifadə ediblər.
Hərbi qüvvələrlə kommersiya gəmiləri arasında əsas əlaqə nöqtəsi olan Böyük Britaniya Kral Donanmasının UKMTO dəniz təhlükəsizliyi agentliyi cümə axşamı baş verən hər hansı insident barədə açıq məlumat verməyib.
Hörmüz boğazında hücumların sayı artıb
Dəniz təhlükəsizliyi mənbələrinin bildirdiyinə görə, sentyabrın 28-dən oktyabrın 5-dək Hörmüz boğazı ətrafında neft, mayeləşdirilmiş təbii qaz və mayeləşdirilmiş neft qazı daşıyan tankerlərə azı 12 hücum olub. Bu, fevralın sonunda İran müharibəsi başlayandan bəri əsas su yolunda qeydə alınan ən yüksək həftəlik göstəricidir.
ABŞ-ın rəhbərlik etdiyi Birgə Dəniz Məlumat Mərkəzinin (JMIC) bazar günü yaydığı qeyddə İran İslam İnqilabı Keşikçiləri Korpusunun boğazda hücumlarının, hücum cəhdlərinin və təzyiq xarakterli fəaliyyətinin davam etdiyi bildirilib. Bu fəaliyyətlərə dronların gəmilərin üzərindən uçurulması, müşahidə və VHF radiosu ilə gəmilərlə əlaqə saxlamaq da daxildir.
“Bu addımlar İranın əsas tranzit marşrutlarında mövcudluğunu təsdiqləmək və boğazdan keçən gəmilərə təzyiqi davam etdirmək niyyətini göstərir”, – JMIC-in açıqlamasında qeyd olunub.
Tehran boğazda yeni marşrutlara qarşı xəbərdarlıq edib
Tehrana yaxın yüksək vəzifəli regional rəsminin sözlərinə görə, İran qonşu ölkələrə neft ixracı üçün yeni marşrutların açılması cəhdini düşmənçilik addımı sayacağını bildirib.
“İran Hörmüz boğazı üzərində nəzarətin əlindən çıxmasına qətiyyən imkan vermək niyyətində deyil və bəzi regional ölkələrin neft ixracı üçün istifadə etdiyi marşrutları bağlamaq planları hazırdır”, – Tehrandan məlumatlandırılan yüksək vəzifəli diplomat bildirib.
Diplomatın sözlərinə görə, bu, gəmilərə raket və dron hücumlarını, yaxud onları qorxudaraq uzaqlaşdırmaq üçün qayıqların göndərilməsini əhatə edə bilər.
Mənbələrin bildirdiyinə görə, son aylarda Körfəz ölkələrinin neft istehsalçıları yükləri boğazın Oman sahillərinə yaxın hissəsindən keçirməyə, daha sonra isə ABŞ-ın hava dəstəyi ilə Oman körfəzinin açıq sularında başqa gəmilərə ötürməyə çalışıblar.
