Afət Ziyadqızı
Hindistan Respublikasının Bihar ştatının şərqində yerləşən Vaişali (Vaishali) rayonunun Raqhopur ərazisində Qanq çayında göyərtəsində mülki şəxslərin olduğu qayığın aşması nəticəsində ağır fəlakət baş verib. Fövqəladə hadisə nəticəsində azı 13 nəfər həyatını itirib.
"Operativ Məlumat Mərkəzi-OMM" xəbər verir ki, yerli səlahiyyətli orqanların və xilasedicilərin təqdim etdiyi məlumata əsasən, həlak olanların böyük əksəriyyətini azyaşlı uşaqlar təşkil edir.
Qayıqda ümumilikdə 20-yə yaxın sərnişinin olduğu, fəlakət zamanı 7 nəfərin yerli sakinlərin və xilasedicilərin yardımı ilə su hövzəsindən çıxarılaraq xilas edildiyi bildirilir. Yaralılar dərhal yaxınlıqdakı xəstəxanalara təxliyə olunublar.
Hadisə yerinə Ştatın Fövqəladə Hallara Reaksiya Qüvvələrinin (SDRF) xüsusi dalğıc və xilasetmə briqadaları cəlb edilib. Hadisənin qayığın normadan artıq yüklənməsi və çayda axının kəskinləşməsi səbəbindən idarəetmənin itirilməsi nəticəsində baş verdiyi ehtimal olunur.
Fəlakətlə bağlı Hindistanın Baş naziri Narendra Modi və Bihar ştatının rəhbərliyi başsağlığı bəyanatı yayıb, həlak olanların ailələrinə və xəsarət alanlara dövlət tərəfindən maddi yardım ayrılacağını elan ediblər.
Hüquq-mühafizə orqanları tərəfindən hadisənin dəqiq səbəblərinin müəyyənləşdirilməsi istiqamətində araşdırmalar davam etdirilir.
