"Moskva bu təklifi rədd edib"

"Avropa İttifaqı Qara dənizdə təhlükəsiz gəmiçiliyin təmin olunmasına dair razılaşmanın əldə edilməsi məqsədilə Türkiyə, Hindistan və digər tərəfdaşlarla əməkdaşlıq edir".

“Operativ Məlumat Mərkəzi-OMM” xəbər verir ki, bu sözləri Aİ-nin xarici işlər və təhlükəsizlik siyasəti üzrə ali nümayəndəsi Kaya Kallas deyib.

"Hazırda Qara dənizdə sərbəst gəmiçiliyə dair razılaşmanın irəli aparılması məqsədilə beynəlxalq tərəfdaşlarımız, Türkiyə, Hindistan və digər ölkələrlə, o cümlədən Afrikanın ərzaq idxalçısı olan dövlətləri və Qlobal Cənub ölkələri ilə işləyirik", - o qeyd edib.

Kallasın sözlərinə görə, Qara dənizdə gəmiçiliklə bağlı razılaşma insanların həyatının və həyati əhəmiyyət daşıyan yüklərin qorunmasına kömək edəcək.

O bildirib ki, Ukrayna da oxşar təşəbbüslə çıxış edib, lakin Moskva bu təklifi rədd edib.

"Buna görə də diplomatik təmaslar Moskva üzərində davamlı təzyiq və Ukraynaya dəstəklə paralel şəkildə həyata keçirilməlidir", - Aİ rəsmisi vurğulayıb.