Hindistan Sülh Şurasına qoşulur? Dehli ABŞ-nin təklifini dəyərləndirir

Hindistan hökuməti beynəlxalq sülhün qorunması istiqamətində mühüm bir addım atmağa hazırlaşır.

"Operativ Məlumat Mərkəzi-OMM" xəbər verir ki, ölkənin Xarici İşlər Nazirliyinin (XİN) rəsmi sözçüsü Randhir Caysval keçirdiyi brifinqdə Hindistanın ABŞ-dən Sülh Şurasına üzvlüklə bağlı rəsmi dəvət aldığını təsdiqləyib.

Hazırda Hindistan rəhbərliyi bu strateji təklifi dərindən analiz edir. Randhir Caysval məsələ ilə bağlı bu fikirləri səsləndirib:

“Biz ABŞ-dan Sülh Şurasına qoşulmaq barədə dəvət almışıq. Hazırda bu təklif üzərində işləyirik və müvafiq araşdırmalar aparırıq.”

XİN sözçüsü vurğulayıb ki, Hindistan xarici siyasətində Yaxın Şərqdə sülhün, təhlükəsizliyin və diplomatik dialoqun təmin olunmasına hər zaman sadiq qalıb.

Baş nazir Narendra Modinin mövqeyini xatırladan Caysval, xüsusilə Qəzza zolağında və ətraf regionlarda uzunmüddətli sülhə xidmət edən hər bir təşəbbüsün Hindistan tərəfindən müsbət qarşılandığını qeyd edib.