Hindistanın Mərkəzi Dolayı Vergilər və Gömrük Şurası (CBIC) Hörmüz boğazındakı blokada səbəbilə istiqaməti dəyişdirilən xarici yüklər üçün ölkənin bütün dəniz və hava limanlarının müvəqqəti açılmasına qərar verib.
“Operativ Məlumat Mərkəzi-OMM” xəbər verir ki, bununla bağlı xarici KİV məlumat yayıb.
Bildirilib ki, 31 oktyabr 2026-cı ilədək Hindistanda xarici konteyner yüklərinin boşaldılması, saxlanılması və başqa nəqliyyat vasitələrinə yüklənməsinə icazə verilib.
CBIC-in qərarına əsasən, yüklər gömrük nəzarətində qalmalı və yalnız beynəlxalq tranzit və ya reeksport üçün istifadə edilməlidir. Onların Hindistanın daxili bazarında satışına və istifadəsinə icazə verilmir.
Qərarın məqsədi Yaxın Şərqdə davam edən böhran fonunda Hindistanın nəqliyyat infrastrukturundan istifadə etməklə beynəlxalq ticarətin və yük daşımalarının fasiləsizliyini təmin etməkdir.
Avqustun 19-da ABŞ Prezidenti Donald Tramp ABŞ ordusunun Hörmüz boğazındakı blokadanı aradan qaldırdığını və boğazın gəmiçilik üçün açıldığını açıqlamışdı. İran isə gəmilərin marşrutlarını əvvəlcədən İran hakimiyyəti ilə razılaşdırmadan boğazdan keçməsinə icazə verməyəcəyini bildirib.
