Türkiyənin xarici işlər naziri Hakan Fidan Rusiyaya işgüzar səfərinin ilk günündə bir sıra ikitərəfli görüşlər keçirməyi və türk biznes nümayəndələri ilə bir araya gəlməyi planlaşdırır.
"Operativ Məlumat Mərkəzi-OMM" xəbər verir ki, bu barədə TASS agentliyinə Türkiyənin Xarici İşlər Nazirliyindəki mənbə məlumat bildirib.
Mənbənin sözlərinə görə, Hakan Fidan səfər çərçivəsində Rusiyanın xarici işlər naziri Sergey Lavrov ilə danışıqlar aparacaq. O, həmçinin Rusiya prezidentinin köməkçisi Vladimir Medinski və prezidentin müşaviri İqor Levitin ilə görüşəcək, eləcə də Türkiyənin işgüzar dairələrinin nümayəndələri ilə müzakirələr aparacaq.
Bildirilib ki, Hakan Fidanın 16-17 iyun tarixlərində baş tutacaq Moskva səfəri zamanı Ankara ilə Moskva arasında münasibətlər, regional və beynəlxalq təhlükəsizlik məsələləri, eləcə də Rusiya-Ukrayna münaqişəsi ilə bağlı mövzular gündəmdə olacaq.
Nazirin, həmçinin Türkiyənin Rusiya ilə Ukrayna arasında yeni danışıqlara ev sahibliyi etməyə hazır olduğunu bir daha təsdiqləyəcəyi və Qara dənizdə təhlükəsizliklə bağlı təşəbbüslərin müzakirə ediləcəyi gözlənilir.
