Haitinin paytaxtı yaxınlığında yerləşən Kenscoff bölgəsində “Viv Ansanm” adlı cinayətkar qruplaşma tərəfindən genişmiqyaslı silahlı hücum həyata keçirilib.
“Operativ Məlumat Mərkəzi – OMM” xəbər verir ki, hadisə bazar günü gecə saatlarında baş verib. Quldurlar yaşayış məntəqəsinə nəzarəti ələ keçirməyə çalışıb, çoxsaylı evləri yandırıb və yerli sakinləri girov götürüblər.
“Gazette Haiti” portalının hadisə yerində olan müxbirinin məlumatına görə, küçələrdə 43 nəfərin güllələnmiş meyiti aşkarlanıb.
Təhlükəsizlik qüvvələrinin çete üzvlərinin hücumunu dəf etdiyi bildirilsə də, bölgədə əməliyyatlar davam edir.
Kenscoff bələdiyyəsinin sədri Jan Massillon hadisəni “qırğın” adlandırıb. O, “AlterPresse” agentliyinə açıqlamasında yerli hakimiyyət orqanlarının hüquq-mühafizə qurumları ilə birlikdə meyitlərin ərazidən çıxarılması və ekspertiza işlərini həyata keçirdiyini bildirib.
BMT-nin Haiti üzrə İnteqrasiya Ofisinin (BINUH) məlumatına görə, 2026-cı ilin ilk üç ayında ölkədəki zorakılıqlar nəticəsində azı 1642 nəfər həlak olub, 745 nəfər isə yaralanıb.
Qeyd olunur ki, bu rəqəmlərə mart ayının sonunda Aşağı Artibonite bölgəsində 72 saat ərzində 83 nəfərin öldürüldüyü hücumlar da daxildir.
