Gəncə Şəhər Baş Polis İdarəsi tərəfindən keçirilən xüsusi əməliyyat nəticəsində irimiqyaslı narkotiklərin qanunsuz dövriyyəsinin qarşısı alınıb.
Bu barədə “Operativ Məlumat Mərkəzi-OMM”-ə Daxili İşlər Nazirliyindən məlumat verilib.
Tədbir zamanı narkokuryerlikdə şübhəli bilinən 33 yaşlı Ədil Ədilov saxlanılıb. Onun əlindəki idman çantasından yüksək təsiredici xassəyə malik 27 kiloqram 475 qram heroin aşkarlanaraq maddi sübut kimi götürülüb.
Saxlanılan şəxs ifadəsində bildirib ki, narkotik vasitələri sosial şəbəkədə tanış olduğu, şəxsiyyəti istintaqla araşdırılan İran vətəndaşı vasitəsilə əldə edib. O, həmin maddələri şəhər ərazisində müxtəlif ünvanlara çatdırmağı planlaşdırıb.
Rəsmi məlumata görə, Ə. Ədilovdan aşkar olunan heroinin "qara bazar"da dəyəri 1 milyon 600 min manat məbləğində qiymətləndirilir.
Faktla bağlı Gəncə Şəhər Baş Polis İdarəsində cinayət işi başlanılıb. Məhkəmənin qərarı ilə Ə. Ədilov barəsində həbs qətimkan tədbiri seçilib və hazırda əməliyyat-istintaq tədbirləri davam etdirilir.
