Afət Ziyadqızı
Fransanın xarici işlər naziri Jan-Noel Barro ABŞ-ni Livandakı hərbi əməliyyatların dayandırılması üçün İsrailə təzyiq göstərməyə çağırıb.
"Operativ Məlumat Mərkəzi-OMM" xəbər verir ki, nazir bu barədə “Franceinfo” telekanalına müsahibəsində danışıb.
Barro bildirib ki, Fransa Livan ordusuna dəstəyin gücləndirilməsi məqsədilə beynəlxalq konfransın təşkili istiqamətində fəaliyyətini davam etdirir.
Onun sözlərinə görə, regionda sabitliyin təmin olunması üçün diplomatik səylərin artırılması vacibdir.
Nazirin bu açıqlaması ABŞ və İran arasında əldə olunduğu bildirilən anlaşma memorandumunda atəşkəs çağırışlarının yer almasına baxmayaraq, İsrail ordusunun Livanın cənubunda Hizbullahın mövqelərinə və infrastruktur obyektlərinə zərbələri davam etdirməsi ilə bağlı məlumatlar fonunda səsləndirilib.
Barro eyni zamanda İranın nüvə proqramı məsələsinə də toxunub.
O vurğulayıb ki, Fransa Tehranın nüvə proqramı ilə bağlı danışıqlarda üzərinə düşən öhdəlikləri yerinə yetirdiyinə əmin olmadığı halda, BMT Təhlükəsizlik Şurasında İrana qarşı sanksiyaların ləğvini dəstəkləməyəcək.
