OMM Redaksiyası
Fransanın ictimai yayımçısı France Télévisions aktrisa Adèle Haenel-in Qəzza ilə bağlı çıxış etdiyi proqramın təkrar yayımını internet saytından silib.
Haenel bildirib ki, o, sentyabrın 9-da France 5 kanalında yayımlanan “La Grande Librairie” ədəbi proqramının canlı efirində iştirak edib. Aktrisa proqramın sonunda qonaqlara fikirlərini sərbəst ifadə etmək imkanı verildiyini deyib.
O, Instagram-da paylaşdığı videoda çıxışında cinsi zorakılıqdan danışan insanların susdurulması cəhdlərinə və Qəzzadakı vəziyyətə toxunduğunu bildirib. Haenel qeyd edib ki, fikirlərinin sonradan yayımdan çıxarılacağını ehtimal etdikləri üçün komandasının həmin hissəni videoya çəkib.
Aktrisanın sözlərinə görə, France Télévisions çıxışın yalnız həmin hissəsini deyil, bütün proqramın təkrar yayımını saytından silib.
Qərar sol yönümlü “La France insoumise” (LFI) partiyasının deputatlarının tənqidinə səbəb olub. Deputat Gabrielle Cathala sosial şəbəkədə yazıb ki, təkrar yayım Haenel İsrailin fələstinlilərə qarşı soyqırım törətdiyini və Fransanın buna şərik olduğunu bildirdikdən sonra silinib.
LFI deputatı Danièle Obono qərarı “qalmaqallı” adlandırıb. Onun həmkarı Aymeric Caron isə Haenel-in Qəzza ilə bağlı fikirlərinin doğru olduğunu deyib və France Télévisions-u son üç ildə Qəzza ilə bağlı yayım siyasətinə görə tənqid edib. Caron yayımçının təkrar yayımı kimin təzyiqi ilə sildiyini açıqlamasını tələb edib.
Fransanın “Télérama” jurnalı France Télévisions-un silinməyə səbəb kimi Haenel-in fikirlərinin proqramda əks mövqelə cavab verməməsini göstərdiyini yazıb.
Haenel proqramın sonunda belə deyib: “Mən də qərar verdim: danışacağam”. Daha sonra aktrisa “İsrail dövləti Fələstində soyqırım törədir, Fransa isə buna şərikdir. Qəbulolunmaz olanı qəbul etməyin. Buna görə də İsrailə qarşı sanksiyalar tətbiq edin və Fələstini azad edin” fikirlərini səsləndirib.
