OMM Redaksiyası
Gənclər və idman naziri Fərid Qayıbov “Formula-1” Azərbaycan Qran-prisinin ölkədə qeyri-neft sektorunun inkişafına töhfə verdiyini bildirib.
Onun sözlərinə görə, Azərbaycanın Qran-priyə onuncu dəfə ev sahibliyi etməsi və Bakının Dünya İdman Paytaxtı statusu qazanması rəmzi məna daşıyır. Nazir qeyd edib ki, yarış Azərbaycanın beynəlxalq idman tədbirlərində etibarlı tərəfdaş kimi mövqeyini möhkəmləndirir.
Fərid Qayıbov bildirib ki, bu il Qran-prini 300-ə yaxın yerli və xarici media nümayəndəsi işıqlandırıb, yarış 56 xarici televiziya kanalında canlı yayımlanıb. Son üç ildə bütün biletlərin satıldığını deyən nazir əlavə edib ki, tribuna sayı dördə çatdırılıb və ümumi tutum 21 minə yüksəlib.
Onun sözlərinə görə, bu il 17 mindən çox xarici azarkeş yarışı tribunadan izləyib. Dörd gün ərzində ümumilikdə 92 min iştirak qeydə alınıb, Bulvar ərazisindəki əyləncə zonalarında isə ayrı-ayrı günlərdə 25 mindən çox azarkeş olub.
Qayıbov “Formula-1”i idman turizmi, şəhər infrastrukturu və gənclərin sosiallaşması baxımından mühüm layihə adlandırıb. O bildirib ki, yarış çərçivəsindəki konsert və mədəni tədbirlərdə 40 minə yaxın tamaşaçı iştirak edib.
Qeyd edək ki, builki Azərbaycan Qran-prisinin qalibi “Mercedes”in britaniyalı pilotu Corc Rassell olub.
