Federal Aviasiya Administrasiyası (FAA) Massaçusets ştatının Boston Beynəlxalq Hava Limanında iki sərnişin təyyarəsinin toqquşma təhlükəsi ilə üzləşməsi barədə araşdırmaya başlayıb. Bu barədə ABC telekanalı məlumat yayıb.
"Operativ Məlumat Mərkəzi-OMM" xəbər verir ki, hadisə ötən həftə sonu Bostonun "Loqan" hava limanında qeydə alınıb.
Məlumata görə, Dallasdan (Texas) gələn "Delta Air Lines" aviaşirkətinə məxsus sərnişin təyyarəsi eniş etməyə hazırlaşarkən, uçuş zolağında hərəkətdə olan və havaya qalxmağa hazırlaşan "American Airlines" təyyarəsi ilə qarşılaşıb. Fəlakətin qarşısını almaq üçün "Delta Air Lines" pilotları enişi təxirə salaraq təcili olaraq ikinci dövrəyə (go-around) qayıtmaq məcburiyyətində qalıblar.
Bildirilib ki, insident zamanı hər iki hava gəmisi bir-birinə təhlükəli dərəcədə yaxınlaşıb və aralarındakı məsafə cəmi 90 metr (300 fut) təşkil edib. FAA-nın araşdırma qrupu uçuş zolağına icazəsiz daxilolma (runway incursion) hadisəsinin dəqiq səbəblərini və dispetçer idarəetməsində hər hansı bir xətanın olub-olmadığını araşdırır.
