Bu ilin sonuna kimi Rəqəmsal İnkişaf və Nəqliyyat Nazirliyi yanında fəaliyyət göstərən Elektron Təhlükəsizlik Xidmətinin (ETX) nəzdində strateji əhəmiyyətli 3 yeni mərkəz yaradılacaq.
“Operativ Məlumat Mərkəzi-OMM” xəbər verir ki, bu mühüm addım Prezident İlham Əliyevin bu gün təsdiqlədiyi "Rəqəmsal inkişafın sürətləndirilməsinə dair 2026−2028-ci illər üçün Fəaliyyət Planı" çərçivəsində reallaşacaq.
Təsdiqlənmiş sənədə əsasən, Milli Təhlükəsizlik Əməliyyatları Mərkəzi (N-SOC), Milli Kiberinsidentlərə qarşı Mübarizə Mərkəzi (N-CERT) və rəqəmsal sahədə təhqiqat fəaliyyəti üzrə ixtisaslaşmış mərkəzin təsis edilməsi planlaşdırılır.
Yeni infrastruktur ETX-yə ölkədə baş vermiş kiberinsidentlərin toplanılması və kateqoriyalar üzrə cavab reaksiyalarının verilməsi fəaliyyətini daha effektiv koordinasiya etməyə imkan verəcək.
Fəaliyyət Planında nəzərdə tutulmuş tədbirlərin maliyyələşdirilməsi isə dövlət büdcəsi və qanunla nəzərdə tutulan digər mənbələr hesabına təmin ediləcək.
