Ərdoğan: Türkiyənin gündəmində növbədənkənar seçkilər yoxdur

Türkiyənin siyasi gündəmində növbədənkənar prezident seçkilərinin keçirilməsi məsələsi yer almır.

"Operativ Məlumat Mərkəzi-OMM" xəbər verir ki, bu barədə Türkiyə Prezidenti Rəcəb Tayyib Ərdoğan Nazirlər Kabinetinin iclasından sonra xalqa müraciətində bildirib.

Əsas müxalifət partiyası olan CHP-nin sədri Özgür Özəl mütəmadi olaraq erkən seçkilərin keçirilməsi ilə bağlı çağırışlar edir.

Lakin Ərdoğan bu iddialara cavab olaraq vurğulayıb ki, növbəti prezident seçkiləri 2028-ci ildə baş tutacaq və başqa bir plan mövcud deyil.

"Bizim gündəmimizdə nə aralıq, nə də növbədənkənar seçkilər var", - deyə dövlət başçısı qeyd edib.

Bundan əvvəl isə Türkiyə liderinin müttəfiqi, MHP sədri Dövlət Baxçalı da mövcud regional vəziyyət fonunda ölkədə erkən seçkilərin keçirilməsinin qeyri-mümkün olduğunu bəyan etmişdi.