Ərdoğan: "Bölgəmizə sülh İsrailə rəğmən gələcək"

Türkiyə Prezidenti və AK Parti sədri Rəcəb Tayyib Ərdoğan partiyasının Türkiyə Böyük Millət Məclisindəki (TBMM) qrup toplantısında çıxış edərək gündəmdəki məsələlərə münasibət bildirib.

"Operativ Məlumat Mərkəzi-OMM" xəbər verir ki, dövlət başçısı çıxışında həm daxili siyasət, həm də regional təhlükəsizlik məsələlərinə toxunub.

Məlumata görə, Ərdoğan Yaxın Şərqdəki gərginlikləri dəyərləndirərək İsrailin siyasətini tənqid edib. O bildirib ki, bölgədə sülh və sabitliyin təmin olunması üçün Türkiyə konstruktiv rol oynamağa davam edəcək. Prezident, həmçinin İranla bağlı regional problemlərin həlli istiqamətində diplomatik səylərin əhəmiyyətini vurğulayıb.

Bildirilib ki, Türkiyə lideri çıxışında müxalifət partiyalarının fəaliyyətinə də toxunaraq, daxili siyasi çəkişmələrin parlamentin işinə mənfi təsir göstərdiyini qeyd edib. Onun sözlərinə görə, siyasi intriqalar və fikir ayrılıqları demokratik proseslərə zərər vurur.

Qeyd olunub ki, Ərdoğan ölkədaxili təhlükəsizlik məsələlərindən də danışaraq, Milliyyətçi Hərəkat Partiyası (MHP) ilə birlikdə həyata keçirilən “Terrorsuz Türkiyə” hədəfinin uğurla davam etdiyini bildirib. O vurğulayıb ki, terrorla mübarizə ölkənin inkişafı və sabitliyi baxımından prioritet məsələlərdən biridir.

Məlumata əsasən, Prezident Ərdoğan terror təhlükəsinin aradan qaldırılmasının Türkiyənin iqtisadi və sosial inkişafına mühüm töhfə verəcəyini və ölkənin yeni inkişaf mərhələsinə keçidini sürətləndirəcəyini qeyd edib.