OMM Redaksiyası
Azərbaycanın futzal millisinin DÇ-2028-in əsas mərhələsində Çexiyaya qalib gəlmək şansı var. Futzal mütəxəssisi Elman Ələkbərov Lənkəranda keçiriləcək oyun barədə danışarkən komandanın hazırlığını və səfərdəki ilk matçını müsbət qiymətləndirib.
“Rəqiblə ilk matçda futzalçılar pis oynamadılar. Məşqçi Elvin Quliyev oyunu çox yaxşı qurur. Çexiya zəif komanda deyil, heyətində 10-15 ildir birgə çıxış edən təcrübəli oyunçular var. Azərbaycan millisinin heyəti isə gəncləşdirilib. Təcrübələri az olsa da, futzalçılar yaxşı təsir bağışlayırlar”, – Ələkbərov bildirib.
O, Lənkərandakı görüşdə qələbə gözlədiyini deyib və şansları 80-in 20-yə nisbətində dəyərləndirib.
Ələkbərov gənc futzalçıların inkişafı üçün oyun təcrübəsinin vacibliyini də vurğulayıb. Onun sözlərinə görə, milli komanda ildə azı 7-8 yoldaşlıq görüşü keçirməlidir ki, oyunçular təcrübə qazansınlar.
Futzal mütəxəssisi daxili çempionatda komandaların sayının az, keyfiyyətin isə yüksək olmadığını qeyd edib. O, gənclərə diqqət ayrılmasının və onların inkişafına vəsait yatırılmasının vacibliyini bildirib, məğlubiyyətin də normal qarşılanmalı olduğunu söyləyib.
Azərbaycan – Çexiya matçı bu gün saat 16:00-da Lənkəran Olimpiya İdman Kompleksində başlayacaq.
