OMM Redaksiyası
Azərbaycan millisinin üzvü Əhməd Yusifov Bakıda keçirilən cüdo üzrə dünya çempionatında qızıl medal qazanıb. 60 kq çəki dərəcəsində çıxış edən idmançı final görüşünün əvvəlində gözləmədiyi çətinliklə üzləşdiyini, sonradan toparlanaraq öz fəndini tətbiq etdiyini bildirib.
Yusifov yarışdan əvvəl həm medal, həm də çempionluq barədə düşündüyünü deyib. Turnirin gedişində özünü yaxşı hiss etdiyini və qələbə şansını dəyərləndirdiyini vurğulayıb. 27 yaşında dünya çempionu olmaq onun üçün xüsusi sevincdir.
Cüdoçu finaldakı rəqibinə daha əvvəl bir dəfə uduzduğunu xatırladıb. Bu dəfə qələbə məqsədilə tatamiyə çıxdığını bildirən Yusifov kəmərdən tutaraq fəndə başladığı anda uğur qazanacağına inandığını söyləyib.
Yusifov 60 kq-da Azərbaycanın ilk dünya çempionu, ölkənin isə dördüncü dünya çempionu olduğunu qeyd edib. O, uğurunda məşqçilərinin, şəxsi məşqçisinin, babasının və Olimpiya çempionu Elnur Məmmədlinin böyük əməyi olduğunu bildirib. Cüdoçunun növbəti hədəfləri Avropa və Olimpiya çempionluğudur.
