"Yaxın Şərq ABŞ və İran arasında aparılan danışıqların dalana dirənməsi fonunda getdikcə daha qeyri-sabit və gözlənilməz bölgəyə çevrilir".
“Operativ Məlumat Mərkəzi-OMM” xəbər verir ki, bu sözləri Misirin xarici işlər naziri Bədr Əbdül Ati deyib.
“Problem var. Gördüyünüz kimi, hazırda onlar nə sülh, nə də müharibə vəziyyətindədirlər”, - nazir qeyd edib.
Əbdül Ati iki ölkə arasında danışıqların dalana dirəndiyini və bunun Yaxın Şərqi son dərəcə qeyri-sabit və gözlənilməz bölgəyə çevirdiyini deyib.
Onun sözlərinə görə, İran tərəfi anlaşma memorandumuna əməl etməyə hazır olduğunu bildirib.
Lakin Misirin xarici işlər naziri hesab edir ki, hazırda İranla danışıqları diplomatlardan daha çox SEPAH aparır.
Nazir vurğulayıb ki, bütün çətinliklərə baxmayaraq, Vaşinqtonla Tehran arasında münaqişənin həlli yollarının axtarışını davam etdirmək lazımdır.
Misirin xarici işlər naziri həmçinin bildirib ki, Qəzza zolağında davam edən münaqişə, Hörmüz boğazının blokadaya alınması və Yəməndəki husilərin Qırmızı dənizdə gəmilərə hücumları səbəbindən Misir iqtisadiyyatı ciddi çətinliklərlə üzləşib.
Məlumat üçün bildirək ki, Misir ABŞ və İran arasında aparılan danışıqlarda vasitəçi ölkələrdən biridir.
