Afət Ziyadqızı
Rusiya hərbi təyyarəsi Cənubi Koreyanın hava məkanına yaxın ərazidə yerləşən Hava Hücumundan Müdafiə İdentifikasiya Zonasına (KADIZ) qısa müddətlik daxil olub.
“Operativ Məlumat Mərkəzi – OMM” xəbər verir ki, “Yonhap” agentliyinin məlumatına görə, Cənubi Koreya Baş Qərargahı insidentlə bağlı açıqlama yayıb.
Məlumata əsasən, Rusiya təyyarəsi ölkənin şərq istiqamətində yerləşən KADIZ ərazisinə daxil olduqdan qısa müddət sonra bölgəni tərk edib.
Cənubi Koreya tərəfi təyyarənin ölkənin suveren hava məkanını pozmadığını bildirib. Bununla belə, təhlükəsizlik tədbirləri çərçivəsində Cənubi Koreya Hərbi Hava Qüvvələri bölgəyə döyüş təyyarələri göndərib.
Qeyd edək ki, Hava Hücumundan Müdafiə İdentifikasiya Zonasının (ADIZ) beynəlxalq hüquqda dəqiq müəyyən edilmiş statusu yoxdur və bu zonalar dövlətlər tərəfindən birtərəfli qaydada yaradılır.
ADIZ ölkənin suveren hava məkanı hesab edilmir. Lakin xüsusilə hərbi təyyarələrin bu zonalara daxil olması potensial təhlükə kimi qiymətləndirilə və qarşı tərəfin hərbi reaksiyasına səbəb ola bilər.
