OMM Redaksiyası
Əfqanıstanın şimal-şərqində yerləşən Bədəxşan vilayətində ağır yol-nəqliyyat hadisəsi baş verib.
"Operativ Məlumat Mərkəzi-OMM" "Tolonews" telekanalına istinadən xəbər verir ki, Bharak-Arghanvah yolu ilə hərəkət edən nəqliyyat vasitəsi idarəetmədən çıxaraq uçuruma yuvarlanıb.
Faciə nəticəsində 15 nəfər dünyasını dəyişib, 3 nəfər isə müxtəlif dərəcəli bədən xəsarətləri alıb.
Rəsmi qurumların açıqlamasına əsasən, həlak olanların 6-sı uşaq, 5-i qadın, 4-ü isə kişidir.
Hadisənin ən sarsıdıcı məqamlarından biri isə qəzada eyni ailədən olan 5 nəfərin vəfat etməsidir. Həmin ailədən yalnız bir azyaşlı uşaq sağ qala bilib.
Qeyd edək ki, bölgədəki çətin relyef və yol infrastrukturunun qeyri-qənaətbəxş olması bu növ bədbəxt hadisələrin baş vermə riskini artırır. Hazırda faktla bağlı araşdırmalar davam etdirilir.
