OMM Redaksiyası
Əfqanıstan Müdafiə Nazirliyi ölkənin şərqində yerləşən Nuristan vilayətində 28 döyüşçünün öldürüldüyünü, 32 nəfərin isə yaralandığını açıqlayıb.
Əfqanıstan tərəfinin məlumatına görə, qrup şənbə günü Pakistan sərhədi yaxınlığındakı Kamdeş rayonuna hücumlar həyata keçirmək məqsədilə keçib. Qrupa “İslam Dövləti” silahlı qruplaşmasının üzvlərinin də daxil olduğu bildirilib.
Əfqanıstanın iddiaları
Müdafiə Nazirliyi döyüşçülərə Pakistan milislərinin dəstək verdiyini və onların əksəriyyətinin Əfqanıstanın əvvəlki hökumətinin təhlükəsizlik qüvvələrinin keçmiş üzvləri olduğunu iddia edib.
Əfqanıstan qüvvələri qrupa qarşı əməliyyat keçirib. Nazirliyin açıqlamasında sağ qalan döyüşçülərin Pakistan milislərinin mövqelərinə doğru sərhədi keçərək geri çəkildiyi qeyd olunub.
Əfqanıstan tərəfi həmçinin Pakistanın hərbi qulluqçuları və milis üzvlərinin döyüşçülərlə əvvəlcədən koordinasiya etdiyini, toqquşmalar başlayanda isə geri çəkildiyini bildirib. Nazirlik Pakistan kəşfiyyatını keçmiş əfqan təhlükəsizlik əməkdaşlarını yardım göstərmək adı ilə Pakistana aparmaqda, daha sonra onları təlim keçərək Nuristana göndərməkdə günahlandırıb.
Pakistanın hərbi qurumları və informasiya nazirliyi bu iddialarla bağlı şərh sorğularına dərhal cavab verməyib. “Reuters” Əfqanıstan Müdafiə Nazirliyinin məlumatlarını və itkilərlə bağlı rəqəmləri müstəqil şəkildə təsdiqləyə bilmədiyini yazıb.
Sərhəddə gərginlik artır
Hadisə Pakistanın sentyabrın 21-də Əfqanıstan ərazisinə endirdiyi hava zərbələrindən bir neçə gün sonra baş verib. İslamabad zərbələrin silahlı qrupların sığınacaqlarına yönəldiyini və nəticədə 28 döyüşçünün öldürüldüyünü açıqlamışdı.
Əfqanıstan rəsmiləri isə həmin zərbələr zamanı mülki şəxslərin də öldürüldüyünü bildirmişdi. Əfqanıstandakı Birləşmiş Millətlər Təşkilatının missiyası üç mülki şəxsin öldüyünü təsdiqləyib.
Pakistan uzun müddətdir Əfqanıstanı silahlı qrupların öz ərazisində fəaliyyət göstərməsinə və sərhəddən hücumlar təşkil etməsinə şərait yaratmaqda ittiham edir. Kabul bu ittihamları rədd edir. Yeni qarşılıqlı iddialar iki qonşu ölkə arasında bir sıra sərhədyanı hücumlar və hərbi əməliyyatlardan sonra onsuz da yüksək olan gərginliyi daha da artırıb.
