OMM Redaksiyası
Əfqanıstan qüvvələri ölkənin şərqində yerləşən Nuristan əyalətində bir neçə gün davam edən döyüşlər zamanı 41 silahlını öldürüb, 62 nəfəri isə saxlayıb.
Əfqanıstan Müdafiə Nazirliyinin məlumatına görə, əməliyyatlar Durand xətti yaxınlığındakı Kamdeş rayonunda keçirilib. Nazirlik daha əvvəl 28 silahlının öldürüldüyünü və 32 nəfərin saxlanıldığını açıqlamışdı.
“Son məlumata əsasən, əməliyyatlar zamanı ümumilikdə 41 “Şər-ül-Fəsad” və “Daeş” (İŞİD) silahlısı öldürülüb, daha 62 nəfər isə sağ ələ keçirilib”, – nazirlik bildirib.
Kabil Pakistan nümayəndəsinə etiraz təqdim edib
Əfqanıstan Xarici İşlər Nazirliyi sentyabrın 29-da Pakistanın Kabildəki müvəqqəti işlər vəkilinin çağırıldığını və ona silahlı qrupların Nuristana keçməsi ilə bağlı rəsmi etiraz təqdim edildiyini açıqlayıb.
Əfqanıstan Pakistan ordusunu silahlı qrupların cəlb edilməsi, təşkili, hazırlanması və təchizatına dəstək verməkdə, daha sonra isə həmin qrupları sərhəddən ölkə ərazisinə keçirməkdə ittiham edib.
Əfqanıstan tərəfi bu addımların ölkənin suverenliyi və ərazi bütövlüyünün pozulması olduğunu, həmçinin islam, beynəlxalq, humanitar və mehriban qonşuluq prinsiplərinə zidd sayıldığını bildirib.
Pakistan ittihamları rədd edir
Pakistan daha əvvəl Nuristandakı döyüşlərlə bağlı Əfqanıstanın ittihamlarını əsassız adlandırıb. Pakistanın İnformasiya və Yayım Nazirliyi bazar günü yaydığı açıqlamada ölkənin təhlükəsizlik qüvvələrinin və kəşfiyyat qurumlarının hadisələrə hər hansı formada cəlb olunmasını təkzib edib.
Pakistan tərəfi Əfqanıstanın iddialarını təsdiqləyən heç bir sübut təqdim etmədiyini vurğulayıb. Nazirliyin açıqlamasında şəxsiyyət məlumatları, sənədlər, yazışmalar, kriminalistik dəlillər və müstəqil yoxlama materiallarının mövcud olmadığı bildirilib.
Son hadisələr iki ölkə arasında gərginliyin artdığı və sərhəddə son dövrlərdə qarşıdurmaların baş verdiyi bir vaxta təsadüf edir.
