OMM Redaksiyası
Çin Tayvanla diplomatik əlaqələri dəstəklədiklərinə görə Beliz xarici işlər naziri Frensis Fonseka və Paraqvayın İnformasiya və Kommunikasiya Texnologiyaları naziri Qustavo Villateyə sanksiya tətbiq edib.
Çin Xarici İşlər Nazirliyi oktyabrın 12-də, bazar ertəsi açıqladığı tədbirləri milli suverenlik və təhlükəsizliklə bağlı narahatlıqlarla əsaslandırıb. Pekin hər iki ölkənin rəsmilərini Tayvanla diplomatik əlaqələrin davam etdirilməsini dəstəkləməklə “Çin əleyhinə” mövqe tutmaqda ittiham edib.
Sanksiyalara əsasən, Fonseka və Villatenin materik Çinə, Honkonqa və Makaoya girişi qadağan olunub. Çin vətəndaşlarına və təşkilatlarına da onlarla əməliyyat aparmaq, əməkdaşlıq etmək və digər fəaliyyətlərdə iştirak etmək qadağandır.
Qərar nazirlərin Tayvan rəsmiləri ilə keçirdiyi son görüşlərdən sonra verilib. Fonseka sentyabrda Belizdə Tayvanın xarici işlər naziri Lin Çia-lunqla, Villate isə iyunda Paraqvayda Tayvan xarici işlər nazirinin müavini Çen Min-çi ilə görüşüb.
Beliz və Paraqvay Tayvanla rəsmi diplomatik əlaqələri saxlayan cəmi 12 ölkə sırasındadır. Pekin özünüidarə olunan adanı öz ərazisinin bir hissəsi hesab edir, Tayvan hökuməti isə bu mövqeyi qəti şəkildə rədd edir.
Sanksiyaların siyasi əhəmiyyəti olsa da, onların praktiki təsirinin məhdud olacağı gözlənilir: Tayvanın diplomatik tərəfdaşlarının rəsmiləri Çinə nadir hallarda səfər edirlər. Pekin əvvəllər də Tayvanı dəstəkləyən, əsasən Qərb siyasətçilərinə qarşı oxşar məhdudiyyətlər tətbiq edib.
Beliz və Paraqvayın müvafiq nazirlikləri, eləcə də Tayvanın Xarici İşlər Nazirliyi açıqlama üçün göndərilən sorğulara dərhal cavab verməyib.
Sanksiyalar Beliz səfirliyinin oktyabrın 11-də Tayvanla diplomatik əlaqələrin 37-ci ildönümünü qeyd etməsindən qısa müddət sonra elan olunub. Səfirlik “Facebook”da iki ölkə arasında inkişaf, imkanlar və davamlı dostluqla dolu gələcəyə ümid etdiyini yazıb.
Pekin Tayvanın qalan diplomatik tərəfdaşlarını Çinlə münasibətlər qurmağa təşviq etməyə çalışır. 2024-cü ildə Nauru Taypeylə əlaqələri kəsən sonuncu ölkə olub. Ondan əvvəl Honduras 2023-cü ildə Tayvanla onilliklər davam edən münasibətlərinə son qoyub.
