OMM Redaksiyası
Çinli tədqiqatçılar dünyanın ən kiçik kompüter tomoqrafiyası (KT) cihazını hazırlayıblar. “Xtomo-Cube” adlanan portativ qurğu kiçik fosillərin, arxeoloji artefaktların və digər həssas obyektlərin daxili strukturunu görüntüləmək üçün yaradılıb.
Şandun əyalətinin Cinan şəhərində fəaliyyət göstərən “Rayim” şirkətinin hazırladığı cihazın çəkisi cəmi 6 kiloqramdır. Təxminən 14x13x22 santimetr ölçülərində olan qurğu adi ərzaq torbası qədər ağırdır və bir əldə daşına bilir.
“Rayim” şirkətinin baş meneceri, Çin Elmlər Akademiyasının baş mühəndisi Liu Baodong bildirib ki, bu qurğu dünyanın ən kiçik və ən yüngül KT sistemidir. Əvvəlki rekord Almaniyada hazırlanmış və 19 kiloqram ağırlığında olan portativ KT cihazına məxsus idi.
“Xtomo-Cube”un daxilindəki rentgen mənbəyi, fırlanan platforma, detektor və proqram təminatı yerli mütəxəssislər tərəfindən hazırlanıb. Cihaz təxminən 200 vatt enerji sərf edir və adi portativ enerji mənbəyi ilə açıq havada işləyə bilir.
Qurğu fosillər, arxeoloji əşyalar, ilbiz qabıqları, toyuq sümükləri və dərman kapsulları kimi kiçik obyektlərin təhlili üçün nəzərdə tutulub. Onun məkan ayırdetmə qabiliyyəti 80 mikrometrdir. Bu göstərici təxminən insan saçının eninə bərabərdir.
Cihaz 16 millimetrə qədər diametrə malik obyektləri skan edə bilir. Bu imkan arxeoloqlara və paleontoloqlara tapıntıları laboratoriyaya aparmadan, birbaşa ərazidə onların daxili quruluşunu araşdırmağa şərait yarada bilər.
“Xtomo-Cube” muzey konservasiyası, istehsalatda keyfiyyətə nəzarət, əczaçılıq tədqiqatları və materialşünaslıq sahələrində də istifadə oluna bilər. Qurğu hələ kommersiya satışına çıxarılmayıb və onun daha böyük KT sistemləri ilə müqayisədə mürəkkəb obyektləri hansı səviyyədə skan edə biləcəyi araşdırılır.
