OMM Redaksiyası
ABŞ Prezidenti Donald Tramp sentyabrın 19-da “AI Force” adlı xüsusi qurumun yaradılacağını açıqlayıb. O, həmçinin yaxın vaxtlarda süni intellekt üzrə “AI çarı” təyin edəcəyini bildirib.
Tramp “Truth Social” platformasında yazıb ki, yeni təşəbbüs onun ilk prezidentlik dövründə yaratdığı ABŞ Kosmik Qüvvələri nümunəsində formalaşdırılacaq. Prezident yeni qurumun federal hökumətin hansı strukturuna daxil ediləcəyini, necə fəaliyyət göstərəcəyini və hansı səlahiyyətlərə malik olacağını açıqlamayıb.
Bu açıqlama süni intellekt sistemlərinin sürətli inkişafı fonunda hökumətlərin daha ciddi təhlükəsizlik tədbirləri görüb-görməməsi ilə bağlı müzakirələrin artdığı bir vaxtda verilib.
Tramp süni intellektin inkişafının yavaşladılmasına dair çağırışları rədd edib. O bildirib ki, əlavə məhdudiyyətlər ABŞ-ın Çinlə texnoloji rəqabətdə mövqeyini zəiflədə bilər.
“Biz bu inanılmaz sənayenin inkişafına heç bir şəkildə mane olmayacaq və onu boğmayacağıq”, – Tramp deyib. Onun sözlərinə görə, süni intellektdən zərərli istifadənin qarşısını mövcud cinayət və mülki qanunvericiliklə almaq mümkündür.
Trampın mövqeyi “Anthropic” şirkətinin baş direktoru Dario Amodei və “OpenAI” şirkətinin rəhbəri Sem Altman da daxil olmaqla, bir sıra sənaye liderlərinin xəbərdarlıqları ilə ziddiyyət təşkil edir. Həmin şəxslər lazımi təhlükəsizlik tədbirləri olmadan daha güclü süni intellekt sistemlərinin ciddi fəsadlara səbəb ola biləcəyini bildiriblər.
ABŞ Prezidenti bu həftənin əvvəlində süni intellektlə bağlı qorxuları “uydurma” adlandırıb və ölkənin texnologiya şirkətləri üzərində kifayət qədər tənzimləyici səlahiyyətlərə malik olduğunu deyib.
Tramp süni intellekti böyük iqtisadi imkan kimi də qiymətləndirib. O, bu texnologiyanın gələcəkdə ABŞ-ın ümumi daxili məhsulunun 25 faizinə qədərini təşkil edə biləcəyini bildirib.
“Biz Çinə və dünyanın qalan hissəsinə liderlik edirik və mən bu vəziyyəti qorumaq niyyətindəyəm”, – Tramp vurğulayıb.
