OMM Redaksiyası
Cənubi Koreyanın Seongnam şəhərində çərşənbə günü səhər saatlarında avtobus 32 nəqliyyat vasitəsinə çırpılıb, 57 nəfər yaralanıb. AnewZ-in Milli Yanğın Agentliyi və “Yonhap” agentliyinə istinadən verdiyi məlumata görə, yaralılardan doqquzunun vəziyyəti ağırdır.
Qəza yerli vaxtla saat 7:34-də, Seulun cənubunda yerləşən Bundang rayonunda baş verib. Avtobus işıqforda gözləyən nəqliyyat vasitələrinə çırpıldıqdan sonra yolun ortasındakı maneəyə dəyib. Hadisə Qrinviç vaxtı ilə çərşənbə axşamı saat 22:34-də qeydə alınıb.
“Yonhap”ın məlumatına görə, xəsarət alan 48 nəfərin vəziyyəti yüngül olub və yaralananların heç birinin vəziyyətinin həyati təhlükəli olmadığı bildirilib. 60 yaşlarında olan sürücünün idarə etdiyi avtobus dörd başqa avtobusa, yük maşınına və 27 minik avtomobilinə çırpıldıqdan sonra yol maneəsinə dəyərək dayanıb. Məlumatlarda avtobusun toqquşmalar zamanı təxminən 100-150 metr hərəkət etdiyi qeyd olunur.
Milli Yanğın Agentliyi hadisə yerinə 88 təcili yardım əməkdaşı və 33 nəqliyyat vasitəsi göndərib, yaralılara yardım üçün təcili tibbi yardım məntəqəsi yaradıb. “KBS” telekanalının məlumatına görə, avtobusdan çıxarılan sürücü də xəsarət alıb və xəstəxanaya aparılıb.
Yerli media sürücünün polisə avtobusun əyləclərinin sıradan çıxdığını dediyini yazıb. Qəzanın səbəbi və texniki nasazlığın olub-olmadığı hələ müəyyən edilməyib.
Polis sürücünün alkoqol təsiri altında olmadığını bildirib, lakin onun narkotik vasitə qəbul edib-etmədiyini yoxlamağı planlaşdırır. Səlahiyyətlilər toqquşmanın gedişini araşdırmaq üçün avtobusun qeydiyyat məlumatlarını və yaxınlıqdakı müşahidə kameralarının görüntülərini də yoxlayacaqlar.
