OMM Redaksiyası
AnewZ-nin məlumatına görə, çərşənbə axşamı Bolqarıstanın şərqində dumanlı magistralda onlarla avtomobilin iştirakı ilə baş verən zəncirvari qəzada 11 nəfər ölüb. Baş nazir Rumen Radev bildirib ki, toqquşma magistralın hər iki istiqamətində baş verib.
Daxili İşlər Nazirliyinin məlumatına əsasən, 50 yaralı xəstəxanaya aparılıb.
Qəza paytaxt Sofiyanı Qara dəniz sahilindəki Burqas şəhəri ilə birləşdirən A1 magistralında baş verib. Yerli mediada yayımlanan görüntülərdə altı zolağa səpələnmiş avtomobil və yük maşınları görünür; onların bir çoxu əzilib, aşaraq çevrilib və ya yoldan çıxıb.
Hadisə yerinə polis, yanğınsöndürənlər və təcili tibbi yardım briqadaları göndərilib.
Daxili İşlər Nazirliyinin baş katibi Lyubomir Nikolov qəzanın ehtimal olunan səbəbinin duman olduğunu deyib. O, hadisə yerində jurnalistlərə qəzanın Burqas istiqamətində hərəkət zolağında avtobusla yük maşınının toqquşması ilə başladığını bildirib.
Yambol Regional Polis İdarəsinin baş müfəttişi Todor Mişinev Nova TV-yə açıqlamasında bəzi insanların hələ də avtomobillərində sıxışıb qaldığını deyib.
“Hazırda əsas prioritet xilasetmə əməliyyatlarıdır. Onlar başa çatdıqdan sonra prosessual və istintaq tədbirləri görüləcək”, – deyə o bildirib.
Radev Avropa Komissiyasının sədri Ursula fon der Lyayenin Bolqarıstana səfəri zamanı yaydığı bəyanatda qəzanı “faciə” adlandırıb. O, yaralıların təxliyəsi üçün təyyarələr göndərdiyini və hadisə yerinə getməyi planlaşdırdığını bildirib.
Fon der Lyayen səfərini vaxtından əvvəl başa çatdıracağını deyib.
“Dərin hüznlə başsağlığı verir və xilasetmə qruplarına ehtiramımı bildirmək istəyirəm”, – deyə o bildirib.
