Afət Ziyadqızı
Cənubi Koreya Silahlı Qüvvələrinin Baş Qərargahı sentyabrın 21-də demilitarizasiya zonasının (DMZ) qərb hissəsində, Hərbi Demarkasiya Xəttinin (MDL) cənubunda baş vermiş mina partlayışı ilə bağlı rəsmi bəyanat yayıb. "Yonhap" agentliyinin məlumatına görə, insident nəticəsində üç Cənubi Koreya zabiti yaralanıb.
"Operativ Məlumat Mərkəzi-OMM" xəbər verir ki, Seul tərəfinin apardığı araşdırmalar zamanı aşkarlanan mina qalıqlarının Şimali Koreya ordusunun istifadə etdiyi piyada əleyhinə plastik minalarla tam eynilik təşkil etdiyi iddia olunub.
Cənubi Koreya hərbi rəhbərliyi Pxenyanı əraziyə minaları qəsdən yerləşdirməkdə və atəşkəs sazişinin şərtlərini kobud şəkildə pozmaqda ittiham edib.
Cənubi Koreya ordusu bölgədə minalardan təmizləmə əməliyyatlarına başladığını elan edərək, Pxenyandan yaralanan hərbçilərə görə rəsmən üzr istəməyi və yerləşdirilmiş minaların dərhal zərərsizləşdirilməsini tələb edib.
Öz növbəsində Şimali Koreya rəsmi bəyanat yayaraq baş vermiş partlayışa görə hər hansı məsuliyyət daşımadığını bildirib. Pxenyan rəhbərliyi Hərbi Demarkasiya Xətti boyunca hərbçilərinə qarşı hər hansı atəş açılacağı təqdirdə "dərhal və amansız" cavab tədbirləri görüləcəyi barədə xəbərdarlıq edib.
